Medisinsk Mållag er eit yrkesmållag under Noregs Mållag
Formål: Fagleg arbeid og kameratsleg samvær 

Lansering Medisinsk journalskriving 14. september 2025

Medisinsk journalskriving vart lansert i Galleri Nygaten i Bergen.

60 personar møtte opp. Ei blanding av legar (både frå somatikk og psykiatri), sjukepleiarar, fagtermologar, e-helse, familie og vener tok turen i vakkert vér på ein søndag ettermiddag.

Fagbokforlaget var med

Forlaget stilte med Anne Ivarsen som fekk seld rundt 20 bøker, sjølv om ingen medisinstudentar dukka opp på lanseringa. Dei var også med å  organisere påmelding og sponsa  arrangementet.
Redaktør Berit Aandal Gjendem var  forhindra frå å kome. Utan ho, ingen bok.

I selskap med kunst av Odd Nerdrum
Ingen såg ut til å reagere på alle bilete av nakne folk av Odd Nerdrum som var utstilt i denne perioden. Det var vel som ein heilt vanleg dag på jobben for mange. 

Hovedforfattar Bjørn Bendz kom frå Oslo for å feire utgivinga. Han lot seg verve inn i Medisinsk Mållag sjølv om han ikkje heilt har forstått verdien av nynorsk før no.

Panelsamtale
Lottelise Folge (grunnleggjar og tidlegare redaktør av Dagens Medisin) kom heilt frå Tjøme for å leie panelsamtale saman med Bjørn Bendz, hudlege Ingeborg M. Bachmann og Øygunn L. Kallevik. Lottelise er også tidlegare programleiar i Refleks Helse i NRK. Det kunne merkast på måten ho fekk til ein god diskusjon rundt journalskriving. Tema som skikk og bruk, pasientinnsyn i journal, språk i journal, tilgangar for helsepersonell,  kven er journalen for, kva har endra seg og bruk av KI, var tema som vart diskutert.

På pensumlista ved alle dei fire medisinske fakulteta?
Håpet er at medisinstudentar i heile landet no kan bruke den same oppdaterte boka som inneheld 5 heilt nye kapittel som ikkje har vore med i kompendiet Journal1. No er den på pensum for Oslo og Trondheim.

Tre av dei nye kapitla er skrivne av medlemmer i Medisinsk Mållag

Psykiatri - Trond Fjetland Aarre

Hud - Turid Jorunn Thune

Gynekologi - Jostein Tjugum

Andre med nye kapittel

Auge - Eyvind Rødahl

Medisinsk genetikk - Tone I. Nordtveit og Gyri Aasland Gradek

Musikalsk innslag

Cathrine Snipsøyr, Olav Arne Steinkopf og nestleiar Arne E. Nakling tok seg av musikken.

Noregs Mållag var med

Nestleiar i Noregs Mållag Live Havro Bjørnstad kasta glans over tilskipinga. Kor mange som vart verva er usikkert.

Maten var sponsa av Noregs Mållag, noko som gjorde at det kunne bli litt ekstra fest.

Boka er på nynorsk og bokmål
Boka er laga slik at den passar i lomma på ein legefrakk. Legelommeformat. Den fungerer flott på nynorsk og bokmål side om side. Dette er truleg den første boka i Noreg som er laga på dette viset. Etter inspirasjon av Bjørn Sortland si bok "På jobb" om Leif Ove Andsnes. Den er på bokmål og engelsk side om side.

Alle kjenner ein lege som kan ha bruk for ei slik bok. Om ikkje anna for å kome med tilbakemelding på kva som kan gjerast betre om det skulle verte ei ny utgåve.

1. utkast av Medisinsk journalskriving er levert

Mai 2025 vart 1. utkastet av Medisinsk journalskriving levert til Fagbokforlaget. No med fem nye fagfelt som ikkje har vore med i Journal-1: Psykiatri, hud, gynekologi, auge og medisinsk genetikk. Seks stykk frå Medisinsk Mållag har vore med i arbeidet. Nokon har skrive nye kapittel, andre har gitt faglege og språklege råd. Boka er på 100 sider pr. målform. Den skal passe i ein legefrakk, så arka må nok bli litt tynne. Bjørn Bendz (OUS) har gjort ein framifrå jobb med å godkjenne forslag til endringar pluss å gå gjennom nye kapittel. 

Kr. 180.000 i arbeidsstipend frå NFFO

I desember vart leiar tildelt stipend frå NFFO. Med fem månadar frikjøp frå jobb var det mogeleg  å få lande Medisinsk journalskriving innan fristen.

Avtale med fagbokforlaget blei signert i juni 2024

Utdrag av avtalen ligg under. Inntekter vil bli fordelt på Medisinsk Mållag og Bjørn Bendz. Her treng eg hjelp av medlemmene til å kommentere innhaldet i utkast til lærebok. Håpet er å få den på pensumlista til medisinstudentar i heile landet.

Leiar i Medisinsk Mållag får årets nynorskstipend på kr. 50.000 til å revidere, omsetje og lage ny lærebok for medisinstudentar.

Les meir her:

https://www.nm.no/nynorskstipend-til-oygunn-leite-kallevik/

Landsmøte i Noregs Mållag i Trondheim april 2024

Medisinsk Mållag støttar Noregs Mållag sitt krav om å stoppe vidare innføring av Helseplattforma. Når tilsette skal dokumentere i journaler må dei forhalde seg til "smarttekstar" som berre finst på bokmål. Etter norsk lov er det ulovleg å ikkje kunne få skrive på eige språk.

https://www.nm.no/helseplattforma-pa-nynorsk/

Kontakt oss

Tre av medlemmene av styret i 2007 held framleis stand, så målet er framleis mogeleg å nå i vår regjeringstid. Arbeidet med innhaldet i Medisinsk journalskriving er intensivert, og det er søkt om midlar om å få dette på plass. Eit lag i vekst kan vi seie at vi er.

Aktuelle artiklar

Draumen om "Ein innbyggjar - ein journal" har enda i eit mareritt av Øygunn L. Kallevik

Medisinsk journalskriving på nynorsk av Geir Sverre Braut

Historikk